HEBDÓMADA PAPAE” NOTÍTIAE VATICÁNAE LATÍNE RÉDDITAE Die duodevicésimo mensis Iúlii anno bismillésimo vicésimo sexto
Cardinális Zuppi hac hebdómada in missióne Ucraínam ádiit. Íterum regiónem a Rússia oppugnátam ille visitávit. Cárcerem quoque invísit, ubi mílites Russi detinéntur.
Pontifícia Académia pro Vita oppositiónem suam advérsus quámlibet euthanásiae formam confírmat, cum legáti Francogállici féria quarta propósitum legis de morte voluntária approbáverint.
Ex Arce Gandúlfi, praetérita die Domínica, post Oratiónem Angélicam, Leo décimus quartus sollicitúdinem suam de bello in Médio Oriénte íterum significávit.
Salútem plúrimam ómnibus vobis audiéntibus núntios Latínos dicit Xavérius Sartre.
Cardinális Zuppi, Praeses Conferéntiae Episcopális Itáliae, hac hebdómada, íterum iam ab inítio belli, Ucraínam visitávit. Legátus peculiáris Summi Pontíficis capitálem Kióviam proféctus est atque locum detentiónis mílitum Russórum invísit; deínde Leópolim pétiit, ubi prófugos, a Communitáte Sancti Aegídii adiútos, convénit. Refert nobis Alexánder De Carolis.
Cardinális, una cum Núntio Apostólico in Ucraína, captívos belli, qui pro Rússia prope Leópolim pugnáverant atque nunc detinebántur, occúrrit. «Matthǽus» se simplíciter appéllans, círciter decem eórum convénit eísque dixit: «Papa Leo me et Núntium huc misit ut magnam spem vobis afferrémus et ad futúrum respícere possétis; ille enim pro vobis orat, ut bellum finiátur atque domum redíre possítis». Dona pórrigens áddidit: «Papa mihi dixit ut clavis ánnulum vobis afférrem. Spero fore ut mox clavem domus vestrae ibi inserátis, ut domum aperiátis et vestros caríssimos complectámini». Kióviae precatiónem lingua Ucraína recitávit: «Concéde pacem iustam, ut captívi domum redíre póssint, púeri famílias suas íterum amplectántur, dispérsi reperiántur. Nobis ómnibus inspíra fortitúdinem et sapiéntiam, ut pacis artífices simus». Leópoli quoque sedem Communitátis Sancti Aegídii visitávit, ubi propinquitátem atque sollicitúdinem Papae Leónis íterum confirmávit.
In Francogállia, die Mercúrii, legáti legem de morte voluntária suffrágiis probavérunt. Pontifícia Académia pro Vita oppositiónem suam advérsus omnem euthanásiae spéciem dénuo confirmávit. Cancellárius, reveréndus Ciucci, declarávit praecípuum esse hóminem comitári atque adiuváre extrémum vitae tempus plene vívere. Silvia Guidi narrat.
Cancellárius Pontifíciae Académiae pro Vita apérte declárat: «Fratres áliis frátribus vitam auférre non possunt. Fratérnitas enim vitae, non morti, insérvit». Dicit étiam «haud fácile esse normas pro univérsa societáte constitúere»; quaprópter addit: «Omne tempus atque omnem sapiéntiam necessáriam sumámus, ad civílem societátem aedificándam quae vitam humánam tueátur». Monet étiam de perículo ne íterum emérgat id quod Francíscus Papa cultúram abiectiónis appellávit. Inter responsiónes áutem quas Ecclésia offérre potest, proxímitas éminet. Adsunt quoque levaménti curae, «disciplína quae gravem interrogatiónem sério áccipit, eam scílicet quae in corde eórum hábitat qui condiciónes difficíllimas experiúntur. Opórtet dénique hómines adiuváre ut ad prudens discerniméntum pervéniant».
Prima domínica commoratiónis aestívae suae apud Arcem Gandúlfi, post Oratiónem Angélicam, Leo décimus quartus ánimum suum ad multas orbis terrárum regiónes convértit, quae bellórum conflíctibus vexántur, unde praesértim cives gravíssimas patiúntur aerúmnas. «Desidérium meum dénuo exprímo», inquit, «ut iter diálogi, occúrsus atque artis diplomáticae constánter et perseveránter persequátur».
Tandem ad finem pervénimus, nova próxima hebdómada habébitis. Valéte.
Obrigado por ter lido este artigo. Se quiser se manter atualizado, assine a nossa newsletter clicando aqui e se inscreva no nosso canal do WhatsApp acessando aqui.
